NOTA DI PRODUKSHON

Proyekto “No Kai”
Curaçao Talent & Showbizz Foundation ta presentá su promé proyekto. E proyekto ta hiba di nòmber “No Kai”. E ta un produkshon sinematográfiko.
E intenshon ta pa traha un pelíkula kompletamente lokal ku e intenshon pa presentá esaki tantu lokal komo internashonal. E historia di e Pelíkula aki ta un idea original di Ana de Freitas, inspirá pa un kansion di e rapper lokal Ramil Cicilia. E eskritornan di e script di e pelíkula ta un kombinashon di Ana de Freitas i Segni Bernardina. Curaçao Talent & Showbizz Foundation ta e organisashon ku a koordiná i produsí e pelíkula. E produkshon a wòrdu kristalisá hasiendo uso di vários profeshonal riba nan tereno.

E proyekto ta parti den tres sekshon:
1. Diseño
2. Formashon
3. Produkshon

Diseño: E proyekto aki a wòrdu diseñá pa Ana de Freitas i Segni Bernardina.

E diseño a enserá:

- Skibi e historia
- Traha e script
- Skohe un team di produkshon
- Buska aktor
- Plan di merkadeo
- Traha Presupuesto
- Buska finansiamentu

Formashon: Direktor di e pelíkula John Nagtegaal a keda enkargá ku e sekshon di formashon di e aktornan pa nan ta apto pa aktuashon sinematográfiko. E proseso aki a dura tres luna.

Produkshon: Òktober 2007 e proseso di produkshon a start. Despues ku e elenko tabata kla pa filmashon, e produkshon sinematográfiko di e pelíkula “No Kai” a start. Gran parti di e filmashonnan a tuma lugá den fin di siman debí ku mayoria aktor ta traha òf ta bai skol.

E proseso di filmashon a dura 24 siman. Kada un dia di filmashon tabata un eksperiensha úniko i inolvidabel. Despues di e proseso di produkshon sinematográfiko a drenta e faseta di editing ku ta e proseso mas difikultoso di e produkshon i alabes ta e proseso tékniko final. Seguidamente a start e kampaña di merkadeo pa e pelíkula “No Kai” i asina kana yega premier.